Pasado na sa Senado ang bersyon sang Basic Education Mental Health and Well-Being Promotion Act, nga kilala bilang House Bill No. 6574, nga ginpasar sang Kamara de Representantes, sa pagpanguna ni Speaker Martin Romualdez. Ang amu nga balaudnon naga-mandato nga magkuha kag magdeploy sang mga mental health professionals sa mga pampubliko nga elementarya, sekondarya nga eskwelahan, mga vocational institutions, kag mga opisina sa central, regional, kag school division governance levels sang Department of Education (DepEd) sa sulod sang lima ka tuig.
Sa pahayag ni Speaker Romualdez, gin-emphasize niya nga kinahanglan mag-abre sang mga posisyon para sa mga Guidance Counselors kag Guidance Services Specialists, nga igatutlo suno sa mga regulasyon nga igahatag sang DepEd kag Department of Health (DOH), upod ang Civil Service Commission (CSC) kag Department of Budget and Management (DBM) para masigurado nga epektibo ang implementasyon sini nga programa kon maisabatas na.
Ang Mental Health and Well-being Office nga i-establisar sa kada school division kinahanglan nga ginapangunahan sang kwalipikado nga mental health professional nga may posisyon nga Guidance Services Specialist kag Salary Grade 24.
Isa pa, ang balaudnon naga-atas man sa DepEd nga maglaan sang igo nga pondo para sa implementasyon sang mga mental health programs kag proyekto nga nagatutok sa mental health concerns sang mga estudyante kag empleyado sang eskwelahan.
Sa pagsaulog sang World Mental Health Day kada Oktubre 10, ini nga balaudnon isa ka dako nga tikang para sa mas maayo nga mental health support sa mga kabataan kag mga empleyado sa edukasyon nga sektor.
#HiligayNews
