Gin-athag ni Senator Christopher “Bong” Go nga wala sia sang ano man nga partisipasyon sa “war on drugs” sang anay presidente Rodrigo Duterte. Direkta nga ginpanginwala ni Go ang alegasyon sang anay PCSO General Manager Royina Garma nga siya kaupod ni Duterte sa nasambit nga kampanya kontra iligal nga droga, kag sa ginpatuman nga reward system.
Ginklaro ni Go nga bilang anay Special Assistant to the President, limitado lang ang iya ulubrahon sadto. Suno sa iya, nagatulok lang sia sang scheduling, appointments, kag presidential engagements sang anay presidente. Dugang pa niya, wala sia sang labot sa mga police operations sang war on drugs kag wala man sia nag-uyat sang kwarta sa opisina sang presidente bangud indi na ini parte sang iya trabaho.
Gindepensahan man ni Go si Duterte, nga ginasiling liwat-liwat nga wala ginatolerar sang iya administrasyon ang mga wala sang kaluoy nga pagpamatay. Ginpunto man ni Go nga si Duterte, bilang abogado kag prosecutor sadto, nahibaluan kag ginarespeto ang layi.
Nagpahayag si Go sang iya dismaya bangud suno sa iya, ginasamuan sang pulitika ang imbestigasyon kag ginabutang sa wala ang mga pagsakripisyo sang nagligad nga administrasyon sa pag-away kontra krimen kag iligal nga droga.
#HiligayNews
