ILOILO CITY – Naga-igting ang Police Regional Office (PRO) sa Western Visayas sang ila kampanya batuk sa mga loose firearms, nga nagresulta sa pagkadakop sang duha ka individual kag pagrekober sang pila ka pusil sa operasyon sang Oktubre 9, 2024.
Ang una nga operasyon natabo pasado alas 4:53 sa aga sa Barangay Igsoligue, Miagao, Iloilo. Nadakpan ang isa ka 35-anyos nga mangunguma, nga ginkilala lang sa alyas nga Anton, kag narekober halin sa iya puluy-an ang isa ka kalibre .22 nga revolver kag isa ka kalibre .22 nga rifle.
Ang operasyon ginpatigayon sang Miagao Municipal Police Station (MPS), upod ang suporta sang Iloilo Police Provincial Office (IPPO) kag ang 601st Mobile Company sang Regional Mobile Force Battalion (RMFB) sa Western Visayas.
Sa lain nga operasyon pasado alas 11:02 sa aga sa Barangay Poblacion, Ibajay, Aklan, nadakpan ang isa ka 48-anyos nga lalaki nga ginkilala nga alyas Nesio. Narekober halin sa iya ang isa ka kalibre .45 nga pusil, isa ka magazine, kag pito ka bala. Ginpatigayon sang Aklan Police Provincial Office’s (AKPPO) Intelligence Unit kag sang Ibajay MPS ang operasyon.
Sa bulan sang Setyembre 2024, ang PRO-Western Visayas nagpatuman sang 27 ka search warrants nga nagresulta sa pagkakumpiskar sang 34 ka nagkalain-lain nga pusil kag duha ka eksplosibo, kag nadakpan man ang 20 ka mga persona. Dugang pa, 289 ka nagkalain-lain nga pusil kag 36 ka eksplosibo ang boluntaryo nga ginsurrender kag gindeposito sa mga police offices sa rehiyon sa amo nga bulan.
Ginpasalamatan ni PRO-Western Visayas Regional Director Police Brigadier General Jack Wanky ang mga pulis sa ila masako nga kampanya batuk sa loose firearms, kag ginpabugal ang kaimportantehan sang nasambit nga kampanya.
“Our campaign has two approaches: first, the ‘iron hand’ through law enforcement operations, and second, the ‘soft hand’ through intensified encouragement of loose firearms holders to deposit or surrender their undocumented or expired firearms to the nearest police unit,” pahayag ni Wanky.
Ginlaragway ni Wanky ang kampanya nga may duha ka pamaagi—ang pagpangdakop sa mga naga-upod sang mga ilegal nga pusil pinaagi sa law enforcement operations, kag ang pag-agda sang mga wala nadokumento ukon expired nga armas nga isurrender ini sa ila malapit nga police units.
#HiligayNews
