Gintumod sang isa ka eksperto nga tuman ka importante nga mahatagan sang igtalupangod ang mental health sa ikaayong lawas sang isa ka tawo.
Sa interview kay Dr. Evony Allisa-Deveza, visiting consultant sa West Visayas State University – Medical Center, iya ginpahayag nga dapat pagtagaan sang importansya ang mental health paagi sa diskusyon ukon pagpakig-istorya sa mga indibidwal nga masami masubo. Suno kay Deveza, kon may ikaayong lawas, dapat man may yara sang ikaayo para sa aton nga utok, ilabi na nga ang brain ang isa sa mga major organ sa aton.
Ginsaysay man sini nga paagi sa pagbukas sang kaugalingon nga panghuna-huna sa mga naga-eksperyensya sang depression kag anxiety, mahimo nga makabulig sa isigkapareho. Gintumod man sang natungdan ang mga tinaga nga ginbuy-an sang World Health Organization (WHO) nga “There is no health without mental health.”
Nag-apelar man ang doktor nga mangin sensitibo sa mga indibidwal nga masami nagapangasubo bangud sila ang may dako nga potensyal nga makaangkon sang mental health issues.
#HiligayNews
