Nagtaliwan si Maestro Gilopez Kabayao, ang bantog nga Ilonggo violinist kag nominee bilang National Artist for Music, sa edad nga 94 sang Sabado. Ang balita ginkumpirmar mismo sang iya asawa nga si Corazon Kabayao sa isa ka post sa social media.
Nagpalab-ot sang kasubo si Iloilo City Mayor Jerry Treñas sa pagkadula ni Kabayao nga isa ka cultural icon. Suno kay Treñas, ang legacy ni Kabayao sa musika magapabilin, indi lang sa syudad sang Iloilo kundi sa bug-os nga pungsod Pilipinas. Ginkilala niya ang daku nga kontribusyon ni Kabayao bilang violinist kag cultural ambassador sang syudad.
Nagpalab-ot man sang pakig-unong ang Manila Symphony Orchestra kag Cultural Center of the Philippines sa pamilya ni Kabayao sa tion sang ila kasubo.
Si Kabayao ang una nga Filipino violinist nga nagpasundayag sa prestihiyoso nga Carnegie Hall sa New York sang 1950. Nakabaton man siya sang Ramon Magsaysay Award sang 1972 kag Gawad CCP Para sa Sining sang 2008 kaupod ang iya asawa nga si Corazon, nga isa man ka musician.
#HiligayNews
