Diretso nga ginsabat ni anay Presidente Rodrigo Duterte ang mga isyu nga naga-angut sa ginahambal nga relasyon nila ni anay Philippine Charity Sweepstakes Office (PCSO) General Manager Royina Garma.
Ini nga pahayag naggwa kasunod sang mga diskusyon sa hearing sang House quad-committee, kun sa diin pila ka mga Kongresista ang nagsiling nga may romantic relationship sila ni Garma. Apang klaro nga ginpanginwala ini ni Duterte.
Suno kay Duterte, natural lang nga malapit sa iya ang mga pulis, ilabi na sang alklade pa siya sa Davao City. Ini nga pagka-malapit iya ginsaysay nga nagatuhaw bilang kabahin sang iya pagkasuporta sa mga law enforcement personnel.
Ginpunto sang anay presidente nga ang pahayag parte sa relasyon nila ni Garma isa lamang ka “chismis” kag wala sang kamatuoran.
Sa pihak naman, si Garma mismo nagpanginwala sang akusasyon nga may personal nga relasyon sila ni Duterte.
Ang pangalan ni Garma, upod kay National Police Commission (NAPOLCOM) Commissioner Edilberto Leonardo, nadalahig man sa mga balita parte sa pagpatay kay Civil Service Office (CSO) board secretary kag anay Iloilo City Police Office (ICPO) Director Wesley Barayuga, pero wala pa gid sang klaro nga konklusyon sa mga imbestigasyon sa nagakatabo.
#HiligayNews
