Ginpahibalo sang Department of Finance (DOF) nga nagapakita sang doble-digit nga pagtubo ang koleksyon sang duha ka pangunahing ahensya sang buhis sa una nga siyam ka bulan sang tuig.
Ang Bureau of Internal Revenue (BIR) kag Bureau of Customs (BoC) nakapanguha sang P2.771 trilyon halin Enero tubtob Setyembre 2024, nga nagapakita sang 10 porsyento nga pagsaka kumpara sa P2.518 trilyon sa pareho nga panahon sang nagligad nga tuig.
Sa sini nga kantidad, ang BIR nakapangolekta sang P2.08 trilyon tubtob Setyembre—12 porsyento nga mas mataas kumpara sa P1.858 trilyon sang 2023. Ini nga koleksyon nagarepresentar sang 73 porsyento sang tinuig nga target sang ahensya nga P2.842 trilyon.
Sa pihak nga bahin, ang Customs nakadangat sang P690.8 bilyon sa Setyembre, nga nagapakita sang pigado nga 4.6 porsyento nga pagtubo kumpara sa P660.39 bilyon sang nagligad nga tuig. Ini nga koleksyon amo ang 73.5 porsyento sang annual target nga P939.7 bilyon.
Sang Mayo, gin-amyendar sang Development Budget Coordination Committee (DBCC) ang ila tax collection projections bangud sang ginahingadlan nga maluya nga pagtubo sang ekonomiya sa subong nga tuig. Ginpaubos ang target sang koleksyon sang BIR kag Customs sa P3.788 trilyon halin sa orihinal nga target nga P4.014 trilyon.
Gin-athag ni Budget Secretary Amenah F. Pangandaman nga ini nga mga pagbag-o natuga bangud sang mga factors nga nagapakita sang mas maluya nga projection sang pagtubo sang ekonomiya, pati na ang mga external factors pareho sang global demand, presyo sang lana, kag mga fluctuations sa exchange rates kag inflation.
#HiligayNews
