Nakibot si Atty. Bryan Cerebo sa dayon-dayon nga pagbayluhanay nanday Mayor Liecel Seville kag Atty. Carl Mondejar sang ila padalaganan nga posisyon, pila lang ka minutos antes magsira ang filing sang certificate of candidacy (COC) para sa 2025 elections sang Oktubre 8.
Suno kay Cerebo, ginahambal niya nga daw naisahan siya upod ang mga pumuluyo sang banwa sang New Lucena, Iloilo bangud sang ginhimo nanday Seville kag Mondejar. Ginasiling ni Cerebo nga may plano siya nga magpadalagan sa pagka-Mayor, apang bangud sa nauna nga pagdeklarar ni Mayor Seville nga ini magapadalagan para sa iya katapusan nga termino bilang alkalde, nagpaiway siya kag nagdesisyon na lang nga magpadalagan sa pagka-Vice Mayor.
Pero, sang ulihi, nasorpresa siya sang ginbalikan nanday Seville kag Mondejar ang Comelec office, kon sa diin gin-withdraw nila ang ila nauna nga COC kag ginsumiter ang bag-o. Sa bag-o nga setup, si Atty. Carl Mondejar ang magakandidato bilang Mayor samtang si Seville naman magapadalagan sa pagka-Sangguniang Bayan (SB) member.
Bisan pa nga pamatyag ni Cerebo nga daw naagawan siya sang tsansa, wala na siya sang mahimo. Ginhambal niya nga may pagsalig siya sa kapasidad ni Atty. Carl nga mangin Mayor sang New Lucena, apang ginpahayag man nga daw nadulaan sang oportunidad ang mga pumuluyo nga magpili sang ila mangin lider sa banwa.
#HiligayNews
