Si Filipino gymnast kag two-time Olympic gold medalist Carlos Yulo nangin sentro sang atensyon matapos iya ginhatag ang iya laragway sa Instagram nga nagasuksok sang “crop top” bilang “Outfit of the Day (OOTD)” sa iya pagbiyahe sa South Korea sang Setyembre 28, 2024.
Ini nga hitsura nakaangkon sang nagkalain-lain nga reaksyon, lakip na ang pagdayaw kag mga kritisismo. “Winning the Olympics and now, breaking toxic masculinity and cultural codes of dressing up. Carlos, you’re the gold,” ang ginhambal ni Ivan Jim Layugan sa Instagram.
Sa pihak nga bahin, gintan-aw ini sa lain nga perspektibo sang iban nga netizens, nga nagtawag kay Yulo nga “agi” kag nagpanawagan nga ang crop tops para lamang sa mga babayi.
Apang nakahibalo ka bala nga madugay na ginsuksok sang mga lalaki ang mga crop tops? Suno sa Those Girls – Vintage Files, ang mga lalaki nga nagasuksok sang crop tops nagasugod pa sa 1970s – 1980s, nga ginpangunahan nanday Sylvester Stallone, Apollo Creed, Carl Weathers, Johnny Depp, Prince, Will Smith, kag iban pa.
Ginpahayag man ni Logan Mahan sang InsideHook media company nga ang amo nga panapton, alternatibo sang mga kalalakihan sa mga gym dress codes sang 1970s nga nagadihon sa mga lalaki nga mag-shirtless. Kabaliskaran sa kasagarang pagpati, ang amo nga panapton may koneksyon sa athleticism.
Samtang ginsiling ni Dr. Shaun Cole, Associate Professor of Fashion sa Winchester School of Art, nga ang male crop top nag-amat-amat nga nawala bangud sa kakulba sang mga lalaki nga mahambalan nga mga bakla. “Post-AIDS there was this backlash of straight men not wanting to be perceived as gay. Fashion, as well, has traditionally been derided as frivolous and feminine,” ang iya ginpahayag.
Apang sa subong nga panahon, nagabalik ang mga male crop tops sa uso. Gani, hindi lamang si Carlos Yulo ang nagasuksok sini; may iban pa nga Filipino artists kag celebrities nga nagasuksok sang crop top, upod nanday Jhong Hilario, Brentman Rock, Kyle Echarri, Albie Casiño, Darren Espanto, kag Dennis Trillo.
#HiligayNews
